Kirmesspruch 1964

Is Frühjoahr, wenn die Knospen sprießen,

un de Zäloot fängt a zu schießen -

Uf deutsch gsocht, de hamä Mai!

In Mai is heuer Pfingsten,

Un Pfingsten söll doch unnä Kerwa sei. 

Dös is ja nu schö ümmer su

un ä dös Joahr sölls su sei,

denn wenns bloß ä Joahr net su is,

do get bestimmt die Kerwa ei.

A Pfingsten ohne Kerwa, do gibt's doch goar kä Froch,

dös sän bei uns in Rauestä goar kännä richtichen Feiertoch.

A Kerwasspruch köart a dezu,

un ich, ich muss nä heuer tu.

Die Spielä wann ja ümmer spenger,

die Polizei wöart ümmer strenger.

Owä trotzdäm, dös wä doch gelacht,

an Kerwasspruch ham mä noch zamgebracht.

Zu manchen Spielnä muß me wos sooch,

mir hoffen die Betreffenden wölln uns net gleich vergloch.

Denn trotzdam hot sich manchä wos riskiert,

wos sünst net jeden Tooch passiert.

-----

Wu sollt denn heuer die Kerwa is tanzen länn,

wenn sa kä Wirtschaft in Rauestä wollt nämm?

Dann Heinzensaal hamm sa zugemacht,

domit hättn sa die Kerwa beinah ausanannä gebracht.

Nu soochts ä mol ehrlich, ihr guttn Leut:

Von Moarktplatz no dä Kulturhall is weisgott zä weit.

Un weil me ämol bei dänn Gasthäuserna sänn,

do will ich von än amol wos breng.

-----

A manchä schafft sich Hünnä a,

un hä die, braucht ä an Hah

Net lang drauf un die Nachwuchsfroch stett.

Da Ma denkt, wenn ich na arscht a poar Klickela het.

A setzt a Glusk un tut 13 Äar trunter,

is dauert net lang un sie get widder runter.

Statt 13 sän bloß noch 10 Äar dort,

die annern 3 sän afach foart.

A setzt sa widdä un net lang trauf,

stett doch dös Biest schä widde auf.

A glotzt un traut sein Ächna net,

Die 13 Äar liechen widdä im Bett.

Da Ma hot su an Gedanken gehecht,

wie wemm die Gluck die Äar salbä hot gelecht.

-----

Do is doch noch a Ding passiert,

übä dan ham sich die Leut ga sehr amüsiert.

Häm von de Arbet get a Ma,

a hot kä Zeit, mä sechts na a.

A Sächla un a Messä kumma nei darä Tasch,

denn nauf in Wold get heit sei Marsch.

Schwäsüweströmt kümmtä ohm a

un tappt an seina Stöckla na.

A tut dös Doarnreißich weg un secht von dä Na -

Himmeldunnewattä, die Stöck die sin la.

Wie rä nu widdä dähäm woar, do hotä gedacht,

Dös Stöckla, dös wöard heit noch rausgemacht.

Dä Archä kümmt ümmä mehr bei na auf,

do nimmtä sei Beil un get noch mol nauf.

Noch getanä Arbet do sechtä säfrieden: "So -

von dan Stoock schneit kännä mehr Schwammla o!"

-----

Owä, ich het goar net gedacht, däs dös

Vürlasn su döaschtich macht.

Ich gläb, ihr nammt mesch net fü übl,

Ich vösuch escht amol dan Kerwäskübel.

Nu ja, ihr denkt, da macht do an Grach,

däzehlt uns a poar Lüchen un me kann net gelach.

------

Su is nu ämol uff darä Wält,

net glücklich alä macht än is Gald.

Un wu sich nu dä Wohlstand mehrt,

am nächsten Tooch a Auto fährt.

A Jung, da führt uff Sumbarch, es woar schä vä Tochen,

Get nei an Laden un käfft sich an Woochen.

A hot sei Fräd dra un denkt - da is schö,

domit loss ich känn foar, dös schaff ich allä.

Noch dä Probefoahrt woarä ascht grün un dann weiß,

denn die Probefoahrt hat an ganz anständichn Preis.

Noch arä Zeit söllä grot naus ho gelacht,

un gsocht ho, dös het noch kännä fätichgebracht.

Denn a hat ja blos amol probiert,

un hot sei Autola gleich ramponiert.

Dös Auto is ja nu widdä gebaut,

Nu kannä a domit gefoahr zu dä Braut.

Die Leut däzeelns, ich wäß net, is woahr,

a hett domit bloß uf Möscheboch wöll foahr.

-----

A annäsch Ding is do unten passiert,

do ham sich zwä ganz gewaltich blamiert.

In dan Neubautanä hinten hot sich mannichs schö ogespielt!

A Witwä un a Veheieratä ham sich do hinten sicher gfühlt.

A poar Findicha ham owä ihr Noos mit neigsteckt,

Un tatsächlich‚ sie ham die zwä entdeckt.

Ze färt is gläb ich a net schö,

denn meistens is mä bei su wos alä.

Die Frä mät, nu wöard me ä noch deschreckt,

grad wenn me mool will vosuch, wie is Kolbfläsch schmeckt.

Denn ümmä zu Süppla, ihr künnt mesch geläb,

die nintä zä wöarchen‚ is net grad a Fräd.

Zwä annera ham sich ga sehr gemücht,

die ham sich owä nei ihre Wohnung veflücht.

Do ham sa nu awäng an sich rümgemöhrt

un kännä hot sich dodra gstört.

Wenn do not wos wa führgekumma.

an normaln Menschen hets in Verstand genumma.

Wie kammä denn owä a dös Warkzeuch däzu,

ganz äfach nein Owaschämä getu?

Da jung Ma schütt nu dös Wassä wag

un denkt, nu schwimmtä fort, da Dräck.

Is wöard Tooch un hall wöarts in Wäch,

A annersch get väbei un secht die ganz Fäch.

Dodrauf hot da Jung Ma sich agestellt

un hot seine Nachtutensilien mit an Stackela nei sein Azuch gegreelt.

-----

Ihr künnts geläb, is gibt noch Leut, die sänn schlau,

owä mancha, die sänn ahm übergenau.

Do secht mä an Hulzhacke mit an Metermooß,

un denkt sich, wos macht denn da Käll blos?

Gat ämol hie un losts auch sooch!

Da Ma hot dänoch üwähaupt kä Blooch.

A hot an besondern Ofen, dös wißtä noch net,

un des a jedes Stückla nein Ofenlooch get,

do hotä is Metämoos genumma

un söll a zu an Ziel sei kumma.

Wie sei Frä dös Hulz nämlich hot vebrennt,

issä uff ämol wie toll rümmgerennt.

In ihrä Aufrechung hot sa sich halt vägassen,

hot nei dän Telefon gschrien: Du Depp, wie kann mä sich bloos vämassen!

Wenn da Kerl is nächst mool die Schieblehr nimmt,

nänna sa a, des wenigstens stimmt.

Wenns ämool räät un Traak sprützt drauf,

ninmt mi halt a Lappla un wischts widdä auf.

Unn wenn mäsch ja net döarr söllt breng,

nimmt mä an Gieser un giests a weng!

Wenn mä su a Red tut, ich gläb Ihr künnts nochgfühl:

Setzt sich öllähand Stäb a,

Ich muss na ascht ämool nospühl.

-----

Is Zähputsen, dös is halt au a Sach!

In dä Kindhät lant mesch un kann ümmänoch Fahlä gemach.

A Ma langt zu sein Schänkla nei,

tut die Zahbbörscht raus un wecht sa ei.

A weng Zahpasta kümmt drauf, dös kann nex gschatt!

Owä dösmool denkt da Ma, dös is heit su glatt!

A wunnet sich, des heit su rutscht.

Mit wos denktä, hot da sich die Zäh geputzt?

Dös Zeuch, dös hot gemacht känn Schaum,

Wierä uf de Tup guckt, trautä sein Achna kaum!

Dänooch denktä, nu ja s’kann passier,

Ich kann die Zäh a mool mit Friesiercreme eigschmier!

-----

Ich mücht zu an Ding noch a poar Wörtä gsooch,

wurübä sich die Kerwa dös Joahr mußt beglooch:

Umä grössä wöard da Gflüchelzuchtverein,

Owä die Äar wann mmä spengä,

Üwerool höard mä Göckä schrein,

unn die Äar beim Sammeln wänn ümmä wengä!

Is kann gsei, die Leut ham Göckämastvätrech,

un a Göckä kann ja nu net a noch Äar gelech!

-----

An manchen is dös schö passiert,

des ä ämool a weng will Alkehol hot inhaliert.

Doch is muß halt not ümmä au sei,

des me unbedingt muß mach Säuerei!

Do get a Ma vom Wöartshaus häm,

un wos ich jetzt sooch, wöard kännä geläm.

A Ma get su Zickzack vur sich hin,

hot nex mehr, wie Alkeholdunst im Sinn.

Is dauert net lang un a licht doard,

kümmt nimmä van dan Flackla foart.

A denkt: Do kann ich liechengeblei,

denn dähäm gibs suwiesu blos mehr Säuerei.

Die Sunn kümmt übern Barchna rüber,

do stettä auf un macht sich trüber,

macht sein Azuch rä un get ahäm,

A denkt su bei sich - Die Frä wöard sich frän.

Dähäm akumma heltä erscht sei Kapp zu de Küchentür nei,

Sei Altä schreit gleich: Kumm du na heit rei!

Nu bistä die ganz Nacht ausgebliem,

Wu host du dich denn su lang rünngetriem?

A hot seinä Frä a Märchen däzehlt,

sie hots net gegläbt un hot weiterkrakelt.

Nu hotä 14 Tooch sei Ässen

müß täl mit seinä Katz ihrn Frässen.

-----

Wu mä ämol bei dan Dingene sänn,

do will ich obä a von a poar annäna wos breng.

Denn sölicha Spiela gibts genuch,

un die köarn nu ämool nein Kerwässpruch.

In arä annern Wöartscheft, do sitzen vier

un trinken in öllä Ruh a Gloos Bier.

Sie trinken noch äs un a noch zwä,

un denken bei sich: Is in Wöartshaus halt schöä!

Wenn mä su aweng dositzt, do wöard mä müsig,

Dös vill Diskudiern wöard än überdrüssig.

Uf die ausgfallnsten Dingä kumme sa drauf,

uff ämool rammelt da äna auf!

Nu wat, dös wa nu doch gelacht,

üwä dan Ding wöard gleich a Wett gemacht.

In darä Wöartschaft - a Gelach un a Gschrei!

Ihr braucht euch net ze frän, die zwanzich Liter sän mei!

Die lumpichn hunnert Gramm Sämmelmahl,

die stopf ich uf ämool nei meine Kehl!

Un ölla Leut, die ham gelacht,

wie de Kerl sein Rachen aufhotgemacht.

Dä aschta Löffel wannert mu nei,

In derä Wöarstschaft a Hallo un a Gschrei!

A schluckt un schluckt un gricht nex nuntä,

dös Zeuch klebt am Gaumä un get äfach net runter.

Sie däzehln, dä Zöst het sei Warkzeuch müß hull,

un dös Zeuch mit an Messl runter müß sull.

Die wu däbei woarn mätn, dös gschietä racht!

Nu mußta a noch dös Fassla bezool!

wie a obä sei Gald hihatgeblecht, mätä,

dös passiert mä im Lam net nochämool!

-----

Vier annära gänn zu dä "Schaumburch" nei.

Is dauert net lang,

da Wöart schaft Schlazeuch un Täläla bei,

un schö is a a Skat zesamm.

Sie mäna, nu dös wa obe gelacht!

Mir vier künnes, do wöard a Ganze gemacht.

Jeda Woch hemm sa sich ämool zammgefunna,

un änä hot in annen is Gald ogenumne.

Sie ham a poar Dienstich zesammgekoart,

is Spiel bleibt nimmä fair, is wöard ball hoart.

An än Ohmt, ihr guttn Leut mä sollts net gläb,

kümmt a Grande vert raus, un aus woar die Fräd.

Da änä steicht auf un schreit, da wöard gsprützt,

doch dodebai is net gebliem.

Dä Spielä hot uf seinä gutten Koarten sich gestützt,

un hot sofort a Re geschrien.

Doch wies ans Auszohln kam - o Graus!

Zohlt kännä doch dös Spiel mehr aus.

Da gutt Ma hot wos von Skatgericht ghöart,

un schickt a Eingab hie ans Gericht.

Nu hört nä‚ wosä von dort hot gricht:

Sie sölltn na aufgab, ihrn ganzn Skat,

sie wüärn öllä vier Lehree am Skat-Internat.

-----

Dös Glasla is ja grad net zä groß,

Mä gricht domit kaum die Zunge nooß.

Die Zunga wöard belzich, dä Durscht ümmä grössä,

Ihr künnt mesch geläb, a Liter wa bessä.

Nu-machs obä jetzt erscht nochämool full,

wenn dei Gießä net langt, mußte halt noch än hull!

-----

In Mescheboch, dös kann me ruich gsooch,

passiern dä obe a Spiela jeden Tooch.

Da änä hot sein Jung not gfunna,

do hotä sich beinah ia Läm genumma.

A rennt gleich nei is Böarchämästäamt

un gibts in ganzen Durf bekannt.

Dös Jüngla woar halt äfach weg,

wenn ich na wißt, wu dös Kalla stackt!

A sucht nochmool dös Haus aus un guckt ganz betroffen:

Denn hintern Ofen wacht da Jung auf, a hot 3 Stunn dähintä gschloffen.

-----

Wenn me aweng Fäld hot, dös is ganz schö,

Öb dös nu in Mescheboch is odä in Raustä.

Ä weng Wieswachs gehöart a däzu,

denn wos will mä denn in Ziechna neitu?

In Mescheboch ledt Hä auf ä ältere Ma,

is fellt na net leicht, mä sechts na a.

A sticht sich än Büntel Hä zesamm

un wieräsch nu grad nauf wollt lang,

do goobs uf ämool an lauten Krach,

Herrje, woar dös a heikla Sach!

A wollt sa noch halt, owe is ging ja net,

A secht sich, wenn ich na annära agezochen het!

Un ächentlich kunnt ich a heit früh

a poar Unterhosen truntägezieh!

-----

A Rauestänä Fra - sie is net schlacht gebaut,

ham sa nagricht, weil sa uf änä Vekäuferin hot vetraut.

In Sunmbarch ham sa Stoff vekäfft,

die Leut hetn sich beinah zerefft.

An Meter 35 gricht sa noch mit,

Sie ham rä gsocht, dös langt fä an enga Schnitt,

Mä hot sa öftersch gsan, des sa ohm dra rümhotgeruckt,

des beim Tanzn net änä ohm neihotgeguckt.

Sie kann owä gemach wosä will‚ die gutt Fra,

denn zätt säsch ohm nauf‚ fählts ja untn a!

-----

Ach Gott, is dös Fürlasn a Ding.

Ich ho schö widdä Durscht, ich muß arscht mol trink!

Nu will ich owä noch a poar Dinge breng,

wu in dan letzten Joahr vürkumma sänn.

Wenn änä wie a Verrücktä schafft,

dä braucht in Bier sei wöarscha Kraft.

A get nei de Wöartschaft, sei Garnitur stett bereit,

denn da Ma doch ümmä kä Zeit.

A stellt sei Flasch Bier uf in Ofen drauf,

setzt sich dänabä un warmt sich aweng auf.

Ga dörschtich macht na die Dozehlerei,

döswachä nimmtä sei Flaschla un schenkt sich ei.

Uf ämool sechtä: Ha ihr guttn Leut! -Naa-

Dös Gloos is la un is Flaschla a!

A hot owä a net hiegeguckt,

dess von dan Gloos in Boden weghatgejuckt.

Un s'is dä owä a a Ding,

wemmä statt ausn Gloos vom Fußboden söll trink.

-----

Mancha annera Leut trinkn zu gärn in Wei,

Sie gänn uf Mescheboch un lodn däzu a poar ei.

Sie trinken a Flaschla, zwä, drei un vier,

un neitrunte kümmt a manchmool a Bier.

S'is spatä wuern un sie wolltn ahäm,

woarn ganz schö beisamm, dös wöard jedes geläm.

Beim Beger seinä Autohall,

do kam da äna doch zu Fall.

A Blooch hatä khot, bisä aufkuntgstieh,

un darä Lehnersgass neikunt gegieh.

A annärä hot mit Ölfoarb dan Nama hingschmiert

un hot die Sturzstell fä ümmä markiert.

-----

Da äna macht Amool a Fäach,

in annern Tooch hotä a blaus Äach.

Ihr Leut, passt jetzt auf, wenn dä is Lecht eiwölltschalt,

des dä net a mool die Tröppn neifallt!

An su arä Sach is es schöänna debei:

Die Leut denken, mä hat dähäm Schlecherei.

-----

A annerä hot a Ziech geschlacht

un hot uf ämool grod naus gelacht.

A hot dan Ma ghullt un a die Frä,

a secht zu nennä: Nu guckt bloos mool dohä.

Euer Ziech, die hot sich warscheinlich vegassen,

un hot von euch an Stoolhos gfrassen.

In Werklichkät hat die Ziech, die Oarm,

an Aufspüllappen in ihrn Doarm.

-----

Ach je, jetzt kümmt noch su a Ding!

Ehr ich dös breng, will ich owä ascht ämool trink!

-----

Schö is‚ wenn mä sich a Säula helt.

Dös wächn hot sich a Rauestänä in Grümpn äs betellt.

Da Bauä mußt mol rauf un packt dös Säula gleich ei,

Untäwachs get dä Kurb auf un dös Säula is frei.

Wie resch nu wollt liefä, hot dös Freckäla gfalt!

A get nochömool nei dan Ladn un frecht ganz vätrossen:

Bei euch hot sich mei Säula net niedä gelossen?

Da Ma mät, a wollt sich aweng Biergald vädien,

ober es wa bessä gewasn, awa dehäim gebliem.

Wierä nu hämfährt, do sechtä dös Ding,

wies in Grümpn in öwern Durf rümspringt!

-----

Wenn me eltä wöard, un is Lafen get schlächt,

do is schö manchmool su a Mopedla racht.

Nu söll me owä vernünftich blei,

söllt net su fix foahr, denn dös brengt nex ei!

Dä Lehnersgass nei do fährt a Ma,

an Schlooch tuts, un a hängt an dan Mäuela dra.

Die Brill, die hot do noch längä ghängt,

bis a Enkela von nä a kam gerennt.

"Wie kann me owä a noch an Unfall sei Brill vegass!"

-----

In Meschäboch ham sa seit kurzen an Ma,

da meldt sich demnächst beim Wintersport a.

A hot heuä schö am Training teilgenumma,

nit Nantl un Pelskapp Aal dard Sohanz roikumma.

Wenn mä su schlau is, wie kann me denn su wos gemach,

un kann sich von die Schulkinnä ausloßgelach?

Herrje, dös woarn dä owä a Sprüng!

wenn ichs nochämool sa dra ich mich liebä gleich rümm!

In aschten großn folcht a zwettä Schlooch,

A hot sichs Bä verstaucht; nu hatä die Blooch.

Ihr wißt, wos me macht, wenn me su wos net ka?

Mä guckt sich liebe die annän a!

Wänn owä net za halfn is, da sölls halt reskier,

A söll sich owä defür die Knochn los nummerier!

-----

In Unteland is a Ding vürkumma,

dös hot dan Ma beinah die Luft ganumma!

Wenn a Ma seinä Frä hilft, dös is ja schö,

Da äna macht ämool is Ofenruhr rä.

Wierä fätich woar, machtesch widdä na,

un zünd sein Ofen widdä a.

A Qualm, a Raach in darä Küch!

A kunnt sich nimmä ghälf, mußt an Ämä süch.

Schütt Wassä neis Feuer, un aus woasch im Nu,

Ich kann euch gsooch, da ma woar fru.

Wie da Qualm woar vezoochn, gucktä genauer mool hi,

fahlt am Ofnruhr net is öwära Knie!

-----

Is is ja noch öllähand passiert,

ich denk owä,ich ho genuch kritisiert.

Mä wölln den Spiela a End nu mach,

Die Hauptsach woar, ihr kunnt mool gelach.

Uns frääts, wenn dä häm gätt un soocht es woar schö,

Me gänn nachsts Joahr widdä zu dä Kerwa uff Rauestä!